ئامادەكردنی : ستار جەباری
سەمیرە عەلی مەندی یەكەم ئافرەتی كوردە ، كە بووە بە راگەیاندنكاری نێو دەوڵەتی* ، . لە چەندین رادیۆی جیهانی و نێودەوڵەتی وەكو " سەوا و بەرلین و پراك "، كاری راگەیاندنی كردووە ، سەمیرەخان خوشكی راگەیاندنكاری نێودەوڵەتی " هاشم عەلی مەندی"یە و لەدایكبووی شاری كەركووكە، بەهۆی سیاسەتی تەعریبی و شۆڤێنیەت و جیاكارییەكانی رژێمی بەعس هەر لە تەمەنی پێنج ساڵییەوە لەگەڵ خێزانەكەی ماڵیان دەگوازرێتەوە بۆ شاری بەغدا، لەوێ پلەكانی خوێندن تەواو دەكات و ماوەیەك وەك وانە بێژ و مامۆستای زمانی ئینگلیزی دەسبەكار دەبێت . بەڵام لەبەر ئەوەی لەخێزانێكی رۆشنبیر و هونەر و راگەیاندن پەروەردە بووە و پێش ئەوەی بچێتە
ناو بینای قوتابخانە هەر بەمنداڵی و بەمەبەستی بەسەردانیكردن ، هونەرمەند و راگەیاندنكاری جیهانی"هاشم عەلی مەندی " برای دەیباتە نێو بینای رادیۆ و تەلەفزیۆنی بەغدا و لەوێ چاوی بەگەورە هونەرمەندان و راگەیاندنكاران دەكەوێت و بەو منداڵییە هەر بۆ خۆشی مایكی رادیۆ دەگرێتە دەست ، ئیدی لەوكاتەوە عاشقی كاری راگەیاندن دەبێت، بۆیە هەر زوو و لەدواقۆناغی ئامادەیی روودەكات جیهانی راگەیاندن . لەكۆتاییەكانی ساڵانی هەشتاكانی سەدەی رابردوو دەچێتە رادیۆی كوردی و وەكو بێژەر دەست بەكار دەبێت و هاوكات كاری پەیامنێریی پاشكۆی كوردی رۆژنامەی عێراق دەكات. بەمەش دەچێتە جیهانی كاری رۆژنامەنووسی و راگەیاندن، و لە هەمان ساڵیش دەبێتە ئەندامی تیپی شانۆی " شۆڕشڤان" كە لەكۆمەڵێ لاوی شانۆكار پێكهاتبوو.
لەسەرەتای نەوەتەكانی سەدەی رابردوو وەكو ئامادەكار و پێشكەشكار لە تەلەفزیۆنی لۆكاڵی دهۆك لەبەشی كوردی دەسبەكار دەبێت،.
ساڵی 1994لەگەڵ خێزانەكەی كۆچ دەكات بۆ وڵاتی ئەڵمانیا و بۆ ماوەی چەندین ساڵ لە رادیۆی بەرلینی ئازاد Sender Freies Berlin (SFB).. كار دەكات، و چەند ساڵێكیش دەبێتە پەیامنێری رادیۆی دەنگی ئەمەریكا ، لەتەك كاری راگەیاندن كاری نووسین و وەرگێڕانیشی كردووە لە پەیمانگای كوردی بۆ لێكۆڵینەوە و پشكنین لە بەرلین . بەشداری و سەرپەرشتی چەندین فیستیڤاڵ و كۆنگرە و كۆنفرانسی نێودەوڵەتی كردووە.
لە ساڵی 2003 بۆ پایتەخی چیك كۆچ دەكات و لە رادیۆی ئەوروپای ئازاد
/ رادیۆی ئازاد،دەسبەكار دەبێت، هاوكات لە رادیۆی عێراقی ئازدیش وەكو بێژەر و پێشكەشكاری هەواڵەكان و ئامادەكار و پێشكەشكار و بەرهەمهێنەری بەرنامە و راپۆرتی سیاسی و كۆمەڵایەتی و رۆشنبیری كار دەكات. و سەدان زنجیرە بەرنامەی " عێراقییەكان لەتاراوگەدا"ش ئامادە و پێشكەش دەكات.
لەساڵی 2015 دەگوازرێتەوە بۆ واشنتۆنی پایتەختی ئەمەریكا، بۆ كاركردن وەكو ئامادەكار و پێشكەشكاری چەندین بەرنامەی رادیۆیی " گەڵاكانی بەیان و عێراق لەمشەودا" لە رادیۆی "سەوای عێراق" دەسبەكار دەبێت .لەساڵی 2019 بووە بە نووسەر و سەرپەرشتیار لەسەر تیمی رادیۆی سەوای عێراق.
لە كۆتاییدا سەمیرەخان دەڵێ: (دوای بیست و شەش ساڵ لە غەریبی كە ژیانم لە پایتەختەكانی ئەوروپا ، بەرلین ، پراگ و لەكۆتایشدا لە واشنتۆن بردە سەر ، تا ئێستا خەون بۆ گەڕانەوە بۆ شارەكەم كەركووك دەبینم ،كە تێیدا لەدایكبووم ، تاكو گوزەرێك بە كۆڵان و شەقام و بازاڕەكانیدا بكەم و سەرێ لەقەڵا سەركەشەكەی بدەم و بیرەوەرییە جوانەكانی منداڵیم لەئامێزی خەڵكە باش و میهرەبانەكانیدا كە خۆشیانم ویست و خۆشیان دەویستم بگەڕێنمەوە، كە لە هزر و یادەوەرییەكانم دا جێیان هێشتووە ، وێنەی كەسایەتییە خۆشەویست و باشە جیاوازەكانی پێكهاتەكانی شارەكەم بگەڕێنمەوە ، كە لەنێوانیاندا فێری زمانەكانی " كوردی و توركمانی و عەرەبی"بووم. شارەزای كەلتوورەكانیان بووم و رەنگە هەر ئەوەش بووبێتە هۆی ئەوەی بە ئاسانی تێكەڵی كۆمەڵگای بیانی ببم و جیا لەزمانی دایك كە كوردییە فێری زمانەكانی تریش ببم، شانازی بەشارەكەمەوە دەكەم و هیوای پێشكەوتن و ئارامی بۆ دەخوازم چونكە شاری هونەر و ئەدەب و رۆشنبیرییە..
.......................
*: زۆر سوپاس بۆ شێخی بێژەرانی كورد " هاشم جەباری" ئەم زانیارییانەی بەزمانی عەرەبی لە خاتوو سەمیرە وەرگرتبوو و بەتایبەت بۆمنی نارد.
