وەك دەركەوت، تا سەردەمی ئەمڕۆ سیاسەت و سیاسەتكردن، لە باشوری كوردستان نەیتوانیوە شێوە زانستیەكەی وەربگرێت، بەداخەوە لە هەگبەی سیاسی هەندێ لایەنی كوردیدا هیچ جۆرە ستراتیژێكی نەتەوەیی بەدی ناكرێت، دەستپێك بە كورتی لە پشت خەمەكانی كەركوك چەند دێڕێك دەخەمە سەر باس‌و پرسیار : ( برتۆڵد بریخت) نووسەری گەورەی ئەڵمان دەڵێت: (ئەوەی لە ڕاستی تێناگات گێلە، بەڵام ئەوەی تێیبگات‌و خۆی لە گێلی بدات ئەوە تاوانبارە)، هەروەها( ئاپۆ)ی بیرمەند و شۆڕشگێڕیش لە بارەی خیانەتەوە دەڵێت: (ئەوەی لە بەرامبەر خیانەت بێدەنگ بێت، گێلە) لەو سۆنگەیەوە ئەگەر بە وردی بە پرسی ریفراندۆمدا بچینەوە، بەداخەوە لە لایەن هەندێ كەس و لایەنی سیاسییەوە، ئەو پرسە بێلایەنانە شیكردنەوەو ڕاڤەی بۆ ئەنجام نەدراوە، بۆ ئەوەی گشتگیر لە خزمەتی گشتیدا بێت، نەوەك بۆ خزمەت و بەرژەوەندی لایەنێك، ئەوەی جێی سەرنجە نازانین بۆ بە خەیاڵ و وەهم و خۆڵكردنە چاوی خەڵك دیزە بەدەرخۆنە بە راستیەكانەوە دەكرێ ، لێرەدا بۆ وەڵامی ئەو پرسیارە دەگەڕێین كە لە باس‌و خواسی رووداوی راپرسیدا رووبەڕوومان دەبێتەوە ئەویش ئەو بابەتەیە كەپێی دەوترێت خیانەت و كەركوك، لێرەوە هەموان مافی خۆمانە لەو خیانەتكارانە بپرسین چۆن و كێن، ئایا بۆ چ مەبەستێك كەركوك و خاك و ئیرادەی نەتەوەییان گورگان خواردوو كرد؟ بەڕاستی زۆر قورسە تەنها لە پێناو راگرتنی دڵی لایەنێك یان بۆ نان و ماستاو خواردنێك سەرەوخوار خوێندنەوە بۆ رووداوەكان بكرێت، لێرەدا ئاماژە بە وتەیەكی نوعام جۆمسكی نووسەر كە دەڵێت: زۆربەری هەرە زۆری گەلان نازانن كە نازانن، كە چی لە دەوروبەریاندا دەگوزەرێت، بەداخەوە بە مەبەست یان بێئاگا لە گۆڕانكارییەكان بە پاساوی نابەجێ ئاماژە بە شانزەی ئوكتۆبەر دەدرێت واتە دوور لە باسی (31 ) ئاپ وەك پەتاو خیانەت لە نێو دوو كەوانەدا، سەیرتر ئەوەیە ریفراندۆمخواز دەكرێنە شكۆ و شانازی وەك ئەوەی هیچ جۆرە هەڵەیەكی سیاسی نەتەوەییان ئەنجام نەدابێ، لە زۆرباردا شكستی دەبێتە تاپۆی ڕەش و بە هاوڵاتی سڤیلی دەفرۆشنەوە، لێرەدا تاكی كورد لە ڕووی ئەخلاقی و مێژووییەوە مافی خۆیەتی بابەتیانە بە تامەزرۆیی لە راستی و وردەكاری ئاكامی ئەو سەرگەردانییە بكۆڵێتەوە كە بۆتە هۆكار بۆ لەدەستدانی نیوەی خاك‌و بە تێكشكانی ئیرادەی یەكێتی نەتەوەیی هەموو پارچەكانی كوردستانیشەوە، بۆیە ئەگەر چاوێك بە مێژووی رابردووی نەتەوەكەمان بخشێنین ناهومێدی دامان دەگرێ لە هزر و بۆچوونی هەندێك سەركردەو سیاسەتمەدار كە چۆن بوونەتە داردەست و جێبەجێكاری پلان و پیلانی داگیركەرانی كوردستان، ئەمە لە لایەك، لەلایەكیتر هێشتا گەلێ هۆكاریتر هەن دەبێ ئاماژەیان پێبدرێ كە شاراوەن، سات‌و كاتی ریفراندۆم و كۆبونەوە باڵا یەك لەدوای یەكەكان و پێشنیار و سەردانی ئەمریكا و رۆڵی ئێران و توركیا و تا دەگاتە پەنجە راوەشاندن و هەڕەشەو حسیب نەكردن بۆ وڵاتە زلهێزەكان، هەموو ئەمانە بە لایەك، بەڵام ئەوەی جێی پرسیارە بە چ ئایدیا و پاساوێك كەركوك و شەنگالتان بۆ فەتحكاران جێهێشت؟ وەڵامتان بۆ رووحی پیرۆزی ئەو پێشمەرگەیە چییە، لە ناو سەنگەری بەرگریدا هەمەڕ و دەبابەی حەسەن و حوسێن جەستەی پیرۆزی شێواند و هەڵنەهات، تەنها ئەوەندە دەڵێم چ شكۆیەكە بۆ مێژوو دەبێ تۆماری بكات، بۆیە خیانەت و خیانەتكار پاكانە هەڵناگرێت، لە كۆتاییدا دەبێ ئەوە بگوترێت ئەوانەی بوونە هۆكاری لە دەستدانی شكۆی كەركوك، دەبێ ئامادەی ئەوەبن بڵێین ئێمە هەڵەمان كرد، ئەگەر لە خەمی كەركوك و یەكێتی نەتەوەییدان، بۆیە مەحاڵە بە تێڕوانین و كۆدی فاشیزمی تورك و عەرەب و عەجەم، كوردستانی ئازاد و سەربەخۆ بێتەدی.
سەلاحەدین ساڵەیی
چاودێری سیاسی
2021/5/20
.jpeg)
